ភ្នំពេញ៖ ផ្អែកតាមវិធានការរបស់រាជរដ្ឋាភិបាល ដែលបានដាក់ចេញក្នុងវេទិការាជរដ្ឋាភិបាល- ផ្នែកឯកជន លើកទី១៩ កាលពីថ្ងៃទី១៣ ខែវិច្ឆិកា ឆ្នាំ២០២៣ កន្លងទៅដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា មុខងារចុះបញ្ជីកែប្រែព័ត៌មាន ក្រុមហ៊ុន/ សហគ្រាសចំនួន៥ នឹងត្រូវដាក់ដំណើរការជាផ្លូវការ ចាប់ពីថ្ងៃទី១៥ ខែមករា ឆ្នាំ២០២៤ នេះតទៅ លើប្រព័ន្ធចុះបញ្ជីអាជីវកម្ម តាមថ្នាលបច្ចេកវិទ្យាព័ត៌មាន (Single Portal)។

សេចក្តីប្រកាសព័ត៌មាននៅថ្ងៃទី១៥ ខែមករា ឆ្នាំ២០២៤ បានឱ្យដឹងថា មុខងារទាំង៥ រួមមាន កែប្រែព័ត៌មាន លម្អិតអាសយដ្ឋាន ទីស្នាក់ការចុះបញ្ជី កែប្រែលក្ខន្តិកៈក្រុមហ៊ុន កែប្រែសកម្មភាពអាជីវកម្ម តម្កល់ប្រតិវេទន៍ប្រចាំឆ្នាំ និង កែប្រែព័ត៌មានគណនីធនាគារ។ ដំណើរការនេះនឹងត្រូវធ្វើឡើងតាម អនឡាញ ទាំងស្រុង ដោយមិនមានតម្រូវការវត្តមានទៅផ្ទាល់ដល់ទីកន្លែងទៀតទេ។

ក្រុមការងារអន្តរក្រសួងរៀបចំសេវាអេឡិចត្រូនិកសម្រាប់ធុរកិច្ចរបស់រាជរដ្ឋាភិបាលបានបញ្ជាក់ថា ការបញ្ចូលមុខងារចុះបញ្ជីកែប្រែព័ត៌មានក្រុមហ៊ុន/សហគ្រាសជាសមិទ្ធផលថ្មីរបស់រាជរដ្ឋាភិបាលនីតិកាលទី៧ នៃរដ្ឋសភា ដើម្បីឆ្លើយតបទៅនឹងសំណូមពររបស់វិស័យឯកជន។

សេចក្តីប្រកាសព័ត៌មានដដែលញូសបញ្ជាក់ថា ក្នុងឆ្នាំ២០២៤ ក្រុមការងារនឹង រៀបចំដាក់ដំណើរការជាបន្តបន្ទាប់ នូវមុខងារចុះបញ្ជីកែប្រែព័ត៌មានក្រុមហ៊ុន/សហគ្រាសផ្សេងទៀត រួមជាមួយ នឹងការបញ្ចូលសេវាសាធារណៈគន្លឹះសំខាន់ៗ ពាក់ព័ន្ធនឹងការធ្វើធុរកិច្ចថ្មីៗបន្ថែមទៀត មកក្នុងប្រព័ន្ធចុះបញ្ជី អាជីវកម្ម តាមថ្នាលបច្ចេកវិទ្យាព័ត៌មាន៕